Divina miserante clementia homini cito labefactanti concessum est, ut qui non se continere per carnis fragilitatem a lapsu valet, habeat unde sua, si deinceps vitam suam a malo abstinuerit, obnubilare peccamina queat, tribuens manu largiflua Christi vocem portantibus sua pro ejus amore, quatinus deposito carnis honere, sibi in eterna concedat una cum eis gaudia exultare. Proinde ego Letberga et tres filii mei Bernardus, Constancius atque Giso, Dei amore ducti, sperantes per Dei misericordiam ad illa supernorum gaudia pervenire, donamus Deo et sanctis apostolis ejus Petro et Paulo, pro animarum nostrarum remedio, et pro anima senioris mei Richelmi, donamus ad locum Cluniacum aliquid ex rebus nostræ proprietatis, vineam videlicet quandam quam conparavimus de Martino, tenentem in longitudine perticas XVII, et de uno fronte perticas III et duos pedes et dimidium, et de alia parte similiter III perticas et VII pedes, et de ambobus frontibus habet IIII^or perticas. Est autem ipsa vinea in Moncellis villa. Item donamus et raxiam unam de vinea in Sarciaco, et cuncta quę ibi sumus visi habere. In prefata quoque villa Moncellis aliam vineam XVII in longitudine perticas habentem, per utrosque frontes IV perticas. Quod si forte (quod minime unquam evenire credimus), aliquis nostrorum heredum vel coheredum, cupiditate ductus avaritiæ, hanc nostram donationem infringere voluerit vel calumpniaverit, iram Dei omnipotentis et suorum apostolorum incurrat, sitque ejus societas cum Juda, Domini proditore, et cum Datan et Abiron, quos tellus vivos absorbuit, nisi ad satisfactionem venerint, immo cogente potestate juditiaria, cui litem intulerit I auri libram coactus persolvat. Nostra autem donatio inviolabilis semper et inconcussa permaneat. S. Letbergę et Bernardi et Constantii atque Gisonis, filiorum ejus, qui hanc cartam fieri et firmare rogaverunt. S. Eldini. S. Gaurenguadi. S. Gisonis.